ចាក់ដីលុបយកដីចំណីព្រែកទន្លេវ៉ៃគោអូស្មាច់ជិត៤ហិកតាធ្វើជាកម្មសិទ្ធិ និងជីកយកអាចម៍ដីដល់ក្បាលប្រេត អាជ្ញាធរឲ្យផ្អាក តែម្ចាស់ជានាយទាហានថ្នាក់ឧត្តមសេនីយ៍នៅតែផ្គើន
12-March-2020 | ដោយ ពលមនសិការ
ស្វាយរៀង៖ មហាជនបានអំពាវនាវសូមឲ្យអាជ្ញាធរស្រុកខេត្ត និងមន្ទីរពាក់ព័ន្ធ មេត្តាចុះពិនិត្យមើលការជីករណ្តៅដីជ្រៅដល់ក្បាលប្រេត យកអាចម៍ដីទៅចាក់លុបដីចំណីព្រែកទន្លេវ៉ៃគោ ត្រង់ចំណុចស្ពានអូស្មាច់ ស្ថិតនៅភូមិតាស្អាង ឃុំកំពង់ចម្លង ស្រុកស្វាយជ្រំ ធ្វើជាកម្មសិទ្ធិធ្វើឲ្យប៉ះពាល់ផ្លូវទឹកនិងអាចលិចលំនៅឋានរបស់ប្រជាពលរដ្ឋនៅរដូវវស្សា។មហាជនអំពាវនាវនេះកើតឡើងនៅរសៀលថ្ងៃទី១១ ខែមីនា ឆ្នាំ២០២០ នៅភូមិតាស្អាង ឃុំកំពង់ចម្លង ស្រុកស្វាយជ្រំ។
បើតាមឈ្មោះ សែន សារ៉ាត់ ភេទប្រុស អះអាងថាជាមេការមើលការខុសត្រូវកន្លែងចាក់ដីនោះបានឲ្យដឹងថា ម្ចាស់ចាក់ដីលុបចំណីព្រែកដៃទន្លេវ៉ៃគោ ត្រង់ចំណុចអូស្មាច់នេះជានាយទាហានថ្នាក់ឧត្តមសេនីយ៍ នៅរាជធានីភ្នំពេញ។
ប្រភពដដែលបន្តទៀតថា ដីដែលនៅតាមមាត់ព្រែកដៃទន្លេវ៉ៃគោនេះ លោកឧត្តមសេនីយ៍ម្នាក់ប្រមូលទិញពីប្រជាពលរដ្ឋនៅភូមិតាស្អាង ហើយបានប្រគល់ប្រាក់ឲ្យប្រជាពលរដ្ឋអស់ហើយ។ ចំណែកការជីករណ្តៅយកអាចម៍ដីគឺជីកនៅលើរណ្តៅចាស់ ហើយយកអាចម៍ដីចាក់លើភ្លឺរណ្តៅចាស់ផងដើម្បីអភិវឌ្ឍន៍ធ្វើជារមណីយដ្ឋានផ្ទះទឹកឬក្រចុះលក់ដូរ។
ហើយអាចម៍ដីមួយផ្នែកទៀតចាក់លើដីចាស់ដែលបានចាក់កាលពីឆ្នាំមុនដែលបានសុំច្បាប់ពីអាជ្ញាធរ និងមន្ទីរពាក់ព័ន្ធអនុញ្ញាតរួចហើយ។ ចំពោះប្រជាពលរដ្ឋភូមិតាស្អាងព្រួយបារម្មណ៍ខ្លាចបិតអូរផ្លូវទឹកលិចលំនៅឋានពួកគាត់នៅរដូវវស្សានោះគឺលោកបានទុកអូស្មាច់នេះហើយនិងកាយដីជាប្រឡាយក្នុងអូឲ្យបានជ្រៅមានផ្លូវទឹកហូមិនឲ្យស្ទះផ្លូវទឹកទេ។
ទាក់ទិនករណីខាងលើនេះដែរលោក ហែម សារិទ្ធិ អភិបាលស្រុកស្វាយជ្រំ លោកបានមានប្រសាសន៍ថា បញ្ហានេះលោកនិងសួរទៅលោកប្រធានមន្ទីរធនធានទឹកនិងឧត្តុនិយមខេត្តស្វាយរៀងថាតើប៉ះពាល់ដីព្រែកសាធារណៈដែរឬយ៉ាងណា? ហើយលោកនិងចុះទៅពិនិត្យមើលនិងរាយការណ៍ជូនលោកអភិបាលខេត្ត។
រីឯលោក គឹម សាវុធ ប្រធានមន្ទីរធនធានទឹកនិងឧត្តុនិយមខេត្តស្វាយរៀងបានឲ្យដឹងថា ការចាក់ដីនៅចំណុចជិតស្ពានអូស្មាច់ភូមិតាស្អាងនេះគឺបានចាក់លើចំណីព្រែកនិងក្នុងព្រែកនៃដៃទន្លេវ៉ៃគោពិតប្រាកដមែនហើយលោកបានរាយការណ៍ជូនឯកឧត្តមអភិបាលរងខេត្តទទួលបន្ទុកដើម្បីពិនិត្យដោះស្រាយ។
លោកអភិបាលខេត្តស្វាយរៀងបានឲ្យម្ចាស់អ្នកចាក់ដីផ្អាកការងារចាក់ដីសិននិងបង្កើតគណៈកម្មការចុះពិនិត្យនិងធ្វើការវាស់វែងពីផលប៉ះពាល់ក៏ប៉ុន្តែដំណើរការនៃការងារចុះវាស់វែងមានលទ្ធផលឬដល់ណានោះទេ។
លោក គឹម ពិសិដ្ឋ ប្រធានមន្ទីររៀបចំដែនដីនគរូបនីយ៍កម្មសំណង់និងសុរិយោដីខេត្តបានមានប្រសាសន៍ថា លោកមិនបានដឹងបញ្ហាចាក់ដីលប់ព្រែកអូស្មាច់នេះទេ ហើយអ្នកចាក់ដីនោះមានបណ្ណឬបានចុះបញ្ជីដីជាលក្ខណៈប្រព័ន្ធហើយក៏លោកមិនអាចដឹងបានដែរសូមឲ្យសួរទៅមន្ត្រីសុរិយោដីស្រុកស្វាយជ្រំ ដែលជាអ្នកចុះវាស់វែងជាមួយគណៈកម្មការរដ្ឋបាលតំបន់វិនិច្ឆ័យភូមិតាស្អាងទើបច្បាស់។
បើតាមមន្ត្រីសាលាខេត្តម្នាក់សុំមិនបញ្ចេញឈ្មោះបានឲ្យដឹងថា ឯកឧត្តមអភិបាលខេត្តបានចេញបញ្ជាឲ្យផ្អាកការចាក់ដីនិងជីករណ្តៅយកអាចម៍ដីទៀតហើយបានផ្អាកមួយរយៈដែរមិននឹកស្មានថា ពួកគេហ៊ានផ្គើនបែបនេះទេ។
បើតាមមន្ត្រីជំនាញម្នាក់បានបង្ហើបឲ្យដឹងថា ការចាក់ដីលុបព្រែកនិងចំណីព្រែកដៃទន្លេវឋ៉ៃគោនេះគឺមានទំហំប្រមាណ៤ហិកតា ចាប់ពីគល់ស្ពានអូរស្មាច់ ទៅដល់ផ្ទះអ្នកភូមិតាស្អាងគឺមានប្រវែងជាង៧០០ម៉ែត្រមានទទឹងជិត២០០ម៉ែត្រមានរណ្តៅដីចំនួន៤រណ្តៅជីកដល់ក្បាលប្រែត្រសូមលោកប្រធានមន្ទីររ៉ែនិងឋាមពលខេត្តចុះទៅមើលផងទាន។ទាក់ទិនករណីនេះដែរមិនអាចសុំការបំភ្លឺពីលោកឧត្តមសេនីយ៍បានទេនៅថ្ងៃទី១២ ខែមីនា ឆ្នាំ២០២០នេះ៕
ចំនួនអ្នកទស្សនា
- ថ្ងៃនេះ9221
- ម្សិលមិញ15191
- សប្តាហ៍នេះ52371
- ខែនេះ74251
- ឆ្នាំនេះ74251
- សរុប20516707